Lawas Muda Mudi (Ramanjeng)

Malalo kau e surat
Bawa salam doa kaku
Bada ling ada rasate

Rasate kaku andi e
Ku potret kau kuni po
Ya timal nonda ku gita

Ajan mu gita rua ate
Lit rea ada si sisi
Ko kau no kuto sanga

Tingi mara palaning re
Nongka ku ngasan baruak
Ku roa rari ku kawa

Petang sarawi kuipi
Sipu ku kamata rua
Bato mo batepang datang

Datang kusangangkang rua
Kutulang kemas katawa
Andi no bosan ku tulang

Bua no bosan ku tulang
Manang mara ka tu pasuk
Tokal mara ka tu antin

Ku tulang bungkak angkang si
Bua ku tokal barangkang
Ku buya rua ling ate

Ada ke nasib ya kompal
Lamin bau si bakompal
Batinku senra ko andi

Nomonda ate sampe su
No soda ku su ko kau
Ko parana ku baesi

LAWAS SEMPU

Ngungku ayam ling samawa
Samung ling sanak do tokal
Mole tu sakompal ate

Ate ku belo ko sempu
Kusalontak mega pitu
Ngantung no ke beang bosan

Mara punti gama ina
Den kuning no tenri tana
Mate bakolat ke lolo

Balong tau no mu gegan
Lenge sempu no gantuna
Denganmu barema ngining

Ling dunia pang tu nanam
Pang akhirat pang tu matak
Ka tu boat po ya ada

Na asi mu samogang
Paboat aji ko Nenek
Ama krik slamat dunia akhirat

Kalalo tua balobo
Depar mo ne ku balangan
No monda susa inta ee

Manyak daeng bao tango
Ling uma pamanto daeng
Panto tu barapan kebo

Puji diri silalayang
Entek ko bao ling angina
Turen ko bawa buying si

Seribu dengan tu tokal
Lamin nonda tua sia
Selingong mata ku nulang

Artikel Dari : 

http://herijuve.wordpress.com/2009/06/03/kumpulan-lawas/